Seeltersk:
Skrieuwmäskinen sunt nit moor in Moude

Saterfriesisch-Kolumnistin Gretchen Grosser über Schreibmaschinen

Ramsloh Wäl ärinnert sik noch an do ächte Skrieuwmäskienen, do so froai luud klapperden? Wäil nit moor so fuul Ljude, fulst tou uurhoald is düsse Technik. Deerfon weet aan Heer uut Oldenburg tou fertällen. Sien Määme is säksuntachentich Jiehre oold, oaber noch gans rüstich un siet Jiehrtjaande goude Skrieuwmäskienen-Früündin. Nu kreech ju toumoal Probleme bie’t Tippjen. Dät lääste Faawbeend waas ferbliekt, hiede sin Tjoonst aproat. Wät nu? N’Winkel, wier dät noch Faawbeende roate, waas nit aptoudrieuwen, nu waas Hollound in Nood, ju Famielje moaste hälpe. Un wuddelk, me foont noch Faawbeende, rund twintich Jiehre oold un uk ienschweißt, so as sik dät ja uk heerd. Een deerfon wude fluks appe Steede in ju “Erika“ installiert, ju Doame skreeuw un saach niks. Ju Tied hiede uk do näie Faawbeende uutdruugje lät. Nu mout ju Määme in Oldenburg uk mäd de Moude gunge. Ju wol sik bumsdie n’Laptop toulääse.

Iek skrieuwe al loange mäd’n Computer, mien Skrieuwmäskienen hääbe iek al loange mee ätter Litauen roat. Man Faawbeende hääbe iek uk noch inne Loade lääsen, do uk al steenoold sunt. Do wol iek nu uk man ljauer äntsuurgje. Iek hiede uurs toacht, min Dokter in Ait skuul do fon mie kriege, uumdät iek deer bie him in dän Röntgenruum fon sien Praxis knu noch een Skrieuwmäskiene klöaterjen heerd hääbe. Man ferbliekene Beende kon düsse ooldwarelske Dokter uk sicher nit moor bruuke.

Ju Skrieuwerske uut Oldenburg wol sik wunnerje, wan ju eerst hiere Computer häd un so ful mäkkelger skrieuwe kon. Am maasten fraut ju sik wäil, juuso as iek, uur dän Radiergummi, die deer oane is. Ju kon altied wier ferbeeterje un houged nit moor een ganse Siede näie tou skrieuwen, wan ju sik moal fersäin häd.

Leserkommentare

Kommentieren Sie diesen Artikel

Das könnte Sie auch interessieren

Mehr zu ...

Ort des Geschehens

Weitere Artikel aus ramsloh

Mehr zu den Themen ...

Mehr aus diesem Ressort