THüLE - „Dat Krokodil, dat Krokodil, dat schwemmt so gern dör´n graoten Nil. Maokt Muul wiet aopen, maokt Muul weer tau, will fräten eene Kakadufrau“, praoten all Kinner tauhope. De sittet immer best taufree in de Plattdütsch-AG. Tweimaol in de Weeke dräiped sik de Schäuler ut de darde un veerde Klasse van de Grundschaule in Middelsten-Thüle taun Platt bi ehre Mestersche Claudia van Koten Lernen, man blot för 18 Minüten.

Speele, Läer un lüttke Riemels, so as de van dat Krokodil, bünt de Lex. Disse kennt meist alle Kinner butenkopps. „Mi geiht d´rum, dat de Kinner Alldaogwörre un Saoken up platt seggen könnt“, vertellt Claudia van Koten. Af an an läst se uk eenen Text vör. Een plattdütsch Läsbauk för alle ligg ehr an´t Hart. „Platt dröff nich dod bliewen, et hört tau use Geschichte dartau“, meend se. De 26 Schäuler ut de darde un veerde Klass fallt platt licht. Ehr Können wiesd se uk bi´t Singen: „Kum eis in, set di daol . . .“ fangt se glieks an un laod mit ehre Hanne un Feute in.

De Plattdütsch-AG van de Grundschaule Mittelsten-Thüle speelt uk faoken Theaoter. „Dat is nich so´n stuuret Lernen as in de annern Stünnen, dat maokt de Kinner wöst gern,“ is sik Claudia van Koten sikker. Se denkt, dat so üm un bi 90 Prozent van de Graotöllerns van ehre Schäulers Platt praoten.

Bi de Öllern süch dat al anneres ut. „Daor kumpt drub an, bünt se in´n Vereen, praot se meist Platt“, meend Claudia van Koten.