Juli 2016, nu is Koaster Boschenhenke al 95 Jiehre dood. Hie lait in Roomelse ap dän oolde Säärkhoaf anne Säärke. Tou sien Skoulbäidene häd hie wäil moal moor kweeden: „Wenn ich auf dem Friedhof liege, und ihr geht an meinem Grab vorüber, dann denkt: da liegt er, den wir zu Tode gequält haben.“

So moonich aan fon sien Sköilere, as die dan leeter wät moor Fernul kreech, hääd wildääge deeran touräächtoacht. Sien Sköilere, do dälich noch lieuwje, kweede: „Boschenhenke waas sun gouden Koaster. Hie häd sien Bäidene so jädden wät biebrange wäild, hie kude sik oaber nit truchsätte.“

Foar aal’n do groote Wäänte dieden mäd him, wät jo wüül’n. Ättere Hoolf-Skoultied koomen jo goar nit wier binne un spielden aal fääre. Boschenhenke stuud inne Doorkesiene un ruup: „Kinder, kommt doch herein!“

Ful stöörden sik nit deeran, jo bleeuwen eenfach buute. Dät Leerden wude nit moaked. Do Bleede uut Leesebouk wuden ruutrieten. Smoals liech dan sun Blääd appe Rääch fon dän Schöiler, die foar dän uur siet, un dan wude ouleesen.

Boschenhenke koom deer goar nit bääte. Inne Klasse waas dät altied so luud, dät geen deer häär! Wan düsse Koaster sik goar nit moor tou hälpen wiste, dan häu hie mäd sin Stok deertwiske. Insen waas die Stok moal wier kuut.

Hermann, min Baabe, wude lossoant, n’näien tou hoaljen. Die Wäänt koom dän ganse Foaremiddai nit wier. Middeeges stuud hie dan foare Doore mäd n’grooten riesenen Boom. Wan Bäidene ättersitte moasten, stuud hiere Koaster striedewied inne Doorkesiene, Ierme uutsprat, uum düsse Bäidene aptouhoolden. Theo waas oaber twiske sien Beene truchkreepen.

Uur Dai fräigede sin Koaster him: „Eilers, warum bist du gestern nicht hiergeblieben?“ Deerap kwaad die Wäänt: „Du hest mie ja goar nich möit!“ So eenfach waas dät! Wan dät inne Skoule so tou Kier geen, koom uk wäil ju Huushollerske mäd n’tjukken Stok. Dan geen dät rund uure Boanke wäch.

Pestoor Kokenge moaste uk toumäts hoald wäide, uumdät hie dan iengreep. Boschenhenke stuud maast un streek sik mäd de Hounde foare Kop loangs. Sien Hounde wieren ful fon Ielt fon aal dät Wrieuwen un Wrosseljen un Innunnerfooldjen deermäd. Ful Bäidene hääbe in ju Tied inne Skoule niks leerd. As jo uut de Skoule koomen, do wisten do noch nit moal, wofuul Meter aan Kilometer hääd. Dät häd loange Jiere so tougeen inne oolde Skoule bie uus Säärke, wier nu uus Schwestern woonje.

Oaber äntelk hääbe dan daach eenige Oolden fon do Bäidene iengriepen. Do hääbe dän Toustand hiere Skoulroat mäldet. Boschenhenke waas läip kroank deerbie wuden. Hie kude eer in Pension gunge.

Hie kude do uk goar nit moor oarbaidje, ofwäil hie sien Bäidene so jädden wät biebrange wäild hiede. Sien Näärwen wieren totoal kaputt.

Koaster Boschenhenke is bloot 64 Jiere oold wuden.