• Jobs
  • Immo
  • Auto
  • Markt
  • Trauer
  • Hochzeit
  • Guide
  • Shop
  • Events
  • Tickets
  • nordbuzz
  • FuPa
  • Werben
  • Kontakt
 
NWZonline.de Region Friesland Kultur

Dat und dit ut Lidd

22.05.2018

Nu is’t wer so wied! In’t Fröhjohr, Sömmer un Harvst givt dat för de, de een Tuun, Vör- oder Blömengaarden hebbt, alltied een Hopen to don. De Tuun moot ümgraaben werden, dor word wat inseiht un Planten un Knullen kaamt in ’n Grund. Un wenn’t all upkaamen is, denn word’t van Tied to Tied dörweed un hackt. Queek, Hesch un anner Unkruud moot jüst in Gaarden nich staahn as Hoor up’n Hund. In mennig een Dörp un Straat löpt dat af so as in een „Görner-Olympiaad“.

All disse Arbeiden blievt faaken nich bloß in de Plünnen hangen! Wenn ick dorbi so an mien Ollen oder anner öller Lü van fröher denk, as de so üm füftig, sästig oder mehr Johrn up’n Puckel harn, do hör’n doch faaken naa süchs Daag mit veel Tuunarbeit: „Oh Gott, mien Krüz is so stief un deit mi so seer,“ un se grepen sick in de Sied över d’ Hüft.

Oder se klaagen naa’t Rümrieten in Gaarden: „Mien Kneen kann’k nich dörbugen un all mien Gelenken sünd woll in Dudd.“ All schlipt mit de Tied af un funktioneert nich mehr so, bi de een mehr un de anner nich so veel.

In Gedanken hör ick noch mien Moder, wenn se vertelln dä, dat bi eer sülven oder ok bi annern wat ut Lidd wen wär. Een schull sogor sien Snuut ut Lidd hat hemmen. All disse lütt Leiden, de so as bi een Fohrtüg wer wegklütert werden möötd, dörlevt wi bilütten ok sülvst, wenn de Hoor gries word un immer mehr Folten to sehn sünd.

Nu könt wi de Ollen van fröher ok’n Ennen bäter verstaahn! Stillkens deit’n sick villicht ok’n bäten entschkulligen oder schkaamen, wat’n dormaals villicht över de „Jösele“ dacht hätt.

Kummt villicht ok de Tied, denn mummelt wi ok Instippels, schniedt Kösten van’t Brood af un könt dit un dat nich mehr don. All wedderholt sick un man weet, dat dat mit een sülvst ok maal so wied is.

Un wenn’t so wied is, wunnert man sick säker, dat de Tied würrelk all dor is. Wi willt ja woll geern good up Stück lang an Johrn leven, aaber nich old un klöterig wen. Stüern könt wi dat man bloß’n bäten!

Ihre Meinung über 

Hinweis: Unsere Kommentarfunktion nutzt das Plug-In „DISQUS“ vom Betreiber DISQUS Inc., 717 Market St., San Francisco, CA 94103, USA, die für die Verarbeitung der Kommentare verantwortlich sind. Wir greifen nur bei Nutzerbeschwerden über Verstöße der Netiquette in den Dialog ein, können aber keine personenbezogenen Informationen des Nutzers einsehen oder verarbeiten.