• Jobs
  • Immo
  • Auto
  • Kleinanzeigen
  • Trauer
  • Hochzeit
  • Guide
  • Shop
  • Tickets
  • nordbuzz
  • Fußball
  • Werben
  • Kontakt
 
NWZonline.de Gartenzeit

„Dat, wat ik besünners geern daan heff, dat maak ik nu in mien Firma“

12.04.2019

Elke Haase ut Ollnborg harr dat maken kunnt, wat in ehr Familje Tradition is; denn weer se vandaag bi de Polizei Kommissarin oder se seet in de Polizeidirektion. Ehr Öllern harrn enen Gaarn, un al as junge Deern harr Elke Haase enen besünners goden Draht to de Natur. Se besoch de „Liebfrauenschule“ in Ollnborg, un Biologie weer een Fack för se, wat se ok besünners geern harr. „An‘n Gymnasium un bi mien Studium harr ik jümmer bannig gode Schoolmester un Dozenten, de hefft mi hulpen un veel för mi daan“, vertellt Elke Haase mit lüchen Ogen. As dat Studium achter ehr leeg, kunn se sik „Diplom-Biologin“ nömen un harr an de Universität as „Wissenschaftliche Angestellte“ ehren Platz. Denn keem een „Tag der offenen Tür“, un een Mann van een Boomschool ut dat Ammerland meen: „Plantenvermehrung, dat weer doch wat för Se, to‘n Bispill Rhododendren ut een Reagenzglas.“ „Dat is‘n goden Gedanken“, dach Elke Haase so för sik, un so hett se1986 ehr egen Firma up de Been stellt; un dat weer dat Fundament för „Piccoplant“, de Firma vandaag. In de eerste Tiet harr se een „Forschungskooperation“ mit de Universität Ollnborg. Dree Johr later kunn se van de Stadt Ollnborg een Hektar Land köpen. Se boo een Labor un een Gewächshuus, un so kunn se wieterhen wat för de Wetenschupp doon. In de eerste Tiet harr se söss Helpslüüd. In een Interview mit dat ZDF för „Mona Lisa“ vertell se, dat se geern amenn 12 Helpslüüd hebben wull. Vandaag röögt 50 Lüüd ehr Hannen för de Firma. Dat Besünnere: Disse Firma hett een Zertifikat as „Anerkannter sozialer Integrationsbetrieb“. Minschen, de een Behinderung hefft, kunnen hier – döör Elke Haase – enen fasten Arbeitsplatz finnen. „Dat löppt twischen de Minschen mit un ahn Handicap best“, weet Elke Haase to vertellen. Mit veel Moot un bannig veel Füür för ehr Saak hett de Diplom-Biologin ut Piccoplant een Unnernehmen maakt, dat weltwiet best upstellt is. Up 15 ha Land finnt wi een Forschungsstation, een grote, moderne Görneree un een Boomschool. In elkeen Johr wasst dor söss Millionen Planten. 170 Arten van Rhododendren sünd dor mit bi, 80 verscheden Azaleen un över 50 Bambus- un Grasarten. Denn kaamt dor noch Planten för de Medizin, Beerenobst oder ok Pappeln för Skandinavien to. Man ganz vörn steiht de Fleder. Dat gifft över 500 verscheden Sorten, un Johr för Johr ward 500 000 Flederplanten verkofft. Piccoplant verkofft weltwiet de mehrsten Flederplanten. „Dat is de wunnerbore Duft un dat Bleuhn in männigeen Klöör, wat mi jümmer woller to‘n Wunnerwarken bringt“, vertellt Elke Haase, ok ditmaal mit lüchen Ogen. Up de ganze Welt is se as Expertin bekannt. Se hett to‘n Bispill al vör dat russisch Parlament snackt; up een van sien Utlandsreisen höör se to dat Begleitpersonal van Bundespräsident Gauck. 2018 is ehr de Pries „Der Oldenburger Bulle“ tospraken wurrn. Dissen Pries gifft dat all twee Johr för een Unnernehmen, dat up enen besünners goden Weg is. Elke Haase hett jümmer Visionen harrt, un de hett se up dissen Weg brocht, wor allns best löppt. För de tokamen Tiet hett se noch‘n Barg Ideen: „Een ne‘et Projekt is al in minen Kopp, man dor kann ik nix to seggen“, seggt Elke Haase mit‘n lachen Gesicht.

Dat Öller: 63

Ik wahn in: Ollnborg

Familjenstand: leddig

Ik mag geern: Bannig geern rüük ik den Fleder

Opregen do ik mi över: Minschen, de nich lehrt hefft, mit‘nanner fründlich umtogahn

An‘n leevsten tö äten: Den Koken van mien Mudder

Dat kummt mi nich op‘n Disch: Gröne Bohnensopp

Dor föhr ik geern maal hen: Dat is för mi‘n grodet Glück, dat ik allns bekieken kunn, wat ik geern sehn wull

Mien Hobby: Mien Hund (een Rottweiler)

An‘n leevsten mag ik höörn: Musik van Felix Mendelssohn-Bartholdy

Dat Book gefallt mi besünners goot:
Blackbox Gardening“ (Mit Planten, de ehren Samen utstreet, enen Gaarn an‘t Leven holen)

Mien gröttster Wunsch: Europa better upstellen, tohoop mit Russland

Meine Themen: Verpassen Sie keine für Sie wichtige Meldung mehr!

So erstellen Sie sich Ihre persönliche Nachrichtenseite:

  1. Registrieren Sie sich auf NWZonline bzw. melden Sie sich an, wenn Sie schon einen Zugang haben.
  2. Unter jedem Artikel finden Sie ausgewählte Themen, denen Sie folgen können.
  3. Per Klick aktivieren Sie ein Thema, die Auswahl färbt sich blau. Sie können es jederzeit auch wieder per Klick deaktivieren.
  4. Nun finden Sie auf Ihrer persönlichen Übersichtsseite alle passenden Artikel zu Ihrer Auswahl.

Ihre Meinung über 

Hinweis: Unsere Kommentarfunktion nutzt das Plug-In „DISQUS“ vom Betreiber DISQUS Inc., 717 Market St., San Francisco, CA 94103, USA, die für die Verarbeitung der Kommentare verantwortlich sind. Wir greifen nur bei Nutzerbeschwerden über Verstöße der Netiquette in den Dialog ein, können aber keine personenbezogenen Informationen des Nutzers einsehen oder verarbeiten.