• Jobs
  • Immo
  • Auto
  • Kleinanzeigen
  • Trauer
  • Hochzeit
  • Guide
  • Shop
  • Tickets
  • nordbuzz
  • FuPa
  • Werben
  • Kontakt
 
NWZonline.de Gartenzeit

Gerold Brüntjen: Vermaak för Obstbööm ut Oma ärn Gaarn

08.06.2018

Meist elkeen hett sik al mal fraagt: „Wat weer wäsen, wenn ik …? Gerold Brüntjen ut Portslog bi Edewecht is wiß kien Utnahm. He weer geern na`t Gymnasium gahn, man sien Öllern weern bang för de Kosten to een Studium. Wat weer anners ut em wurrn? He weer al jümmers mit de Natur verbunnen, darwägen harrr Förster een gode Profession wäsen kunnt - man ahn Studium? Gerold weer de ollste van söss Kinner. He muß al fröh, as sien Geschwister ok, sien Öllern mit up`n Buurnhoff helpen. Kort vör`t Schoolenn geev Vadder , as anner lüttje Bedrieve ok, de Landwirtschap to. Gerold fung 1966 een Utbilden in`e Boomschool Erich von Ohlen in Dänikhorst an. Vandagen kann`n sik dat nich mehr vörstellen, man de Lü to`n Utbilden mussen sogar an`n Saterdag bit middags arbeiten. Kort vör Fieravend muß elkeen Saterdag de Hoff fäägt weern. „ Faken kemen wi garnich na Huus hen“, grient Gerold.

Al in disse Utbildungstiet harr Gerold Brüntjen sik Jungplanten ut Sleswig-Holsteen haalt un harr sik denn na Fieravend of an`t Wäkeneen mit de Planten befaat. As Gesell hett he sik noch paar Jahr Praxiserfahrn in verscheeden Boomscholen in`t Ammerland haalt, ehr he 1974 de Meisterschool in Auerk besöken dee. As nee`e Gaarnermeister hett he denn veer Daag in`e Wääk bi Boomschool Borchers in Surwold warkelt, den Rest van`e Wääk in sien eegen Kulturen. Disse dubbelte Last hett nich lang anholln, siet 1977 hett he sik blots noch um den eegen Bedriev scheert. Mit sien jung Ehefro Ingrid harr he stark Stöön an sien Siet. In drocke Tiden harr de Boomschool Brüntjen 15 Mitarbeiters. Se harrn sik um Laubgehölze, Koniferen of Rhododendron to scheeren. Produzeert wurr för den Groothannel, Privatkunden un sunnerlik för Landschuppsgaarners.

Een Hartenssaak för de beiden sünd de Obstsorten. Al to Grootvadder sien Tiet stunnen 60 verscheeden Sorten in`n Gaarn. De mussen in de 7o er Jahrn för Boomschoolkulturen upgeven wurrn. Ole, starke Sorten gungen Gerold nich ut`n Kopp. He hett sik jümmers mehr mit befaat mit de Pomologie. Mit een NWZ-Anzeig keem Gerold an Adressen van verscheeden Standorte van ool Obstbööm. So kunn he een Reeg van nich mehr so bekannte Sorten upspören. Reiser nehmen, veredeln un in nee`n Muddergaarn säkern, weer een nee`e Upgaav. Tosammen mit anner Lü hett he in`n Januar 1991 den „Pomologenvereen“ to Welt brocht. De Vereen will ool un echte Obstsorten erholln un wieter verbreden. Anfang de 80er Jahrn is he mit Appel-, Beern- un Plumensorten anfungen. „Meist all de olen Appelsorten sünd för Allergiker goot“, stellt Ehefro Ingrid fast.

Mitdem is Gerold Brüntjen in`t Rentenoller ankamen. Beid Söhns Thorsten un Steffen hebbt een anner Profession, darwägen mutt dat Ehepaar Brüntjen överleggen, wo`t wieterlopen schall. „Schull us freun, wenn een Gaarnmeister us Bedriev mit all de Stammkunden övernehmen kunn. Man us Obstsorten-Kultur gäävt wi nich up!“

Beten wat över Gerold Brüntjen:

Dat Öller: 67

Ik wahn in: Portsloge

Familjenstand: Befreet mit Fro Ingrid

Ik mag geern: Gerechtigkeit

Opregen do ik mi över:
Versmuddelee vun‘e Umwelt

An’n leevsten to äten:
Gröönkohl un anner Huusmannskost

Dat kummt mi nich op’n Disch: Brootsoppen

Dar fahr ik geern mal hen: In de wiede Welt

Mien Hobby: Sport, Genealogie (Familienkunde)

An’n leevsten mag ik höörn:
Rockmusik - Pink Floyd is jümmers goot

Dat Book gefallt mi besunners goot:
„Jokehnen“ van Arno Surminski

Mien grötste Wunsch: Gesund blieven

Dat is mien Snack:
„In der Ruhe liegt die Kraft“

Ton verstahn:

Plattdeutsch                  Hochdeutsch

Vermaak           Vergnügen, Leidenschaft

Auerk              Aurich

sik scheeren     sich kümmern

Stöön          Unterstützung

drock        geschäftig

Profession      Beruf

Weitere Nachrichten:

Pink Floyd | Nordwest-Zeitung

Ihre Meinung über 

Hinweis: Unsere Kommentarfunktion nutzt das Plug-In „DISQUS“ vom Betreiber DISQUS Inc., 717 Market St., San Francisco, CA 94103, USA, die für die Verarbeitung der Kommentare verantwortlich sind. Wir greifen nur bei Nutzerbeschwerden über Verstöße der Netiquette in den Dialog ein, können aber keine personenbezogenen Informationen des Nutzers einsehen oder verarbeiten.