Lüüd van de „Deutschen Gesellschaft für Gartenkunst & Landschaftskultur e. V. (DGGL)“ van den „Landesverband Bremen/Niedersachsen“ keken sik in‘n Harfst 2013 den Gaarn van Margret Hoffmann in Delmenhorst an. Se wull geern to den ganz besünnern Kring „Offene Gärten“ tohöörn. För de Kommission weer de 1000 Quadratmeter Gaarn mehr as best, un so wurd dit Placken Eer den Naam „Garten der Leidenschaft“ tospraken. För dissen Gaarn sünd dat just de rechten Wöör, is Margret Hoffmann doch mit veel Füür een Gornersche in ehren egen Gaarn. De grote Leevde to‘n Gaarn keem man eerst in de lesden Johrn. Margret Kliese, so ehr Deernsnaam, is in de Gemeende Gannersee upwussen. Weer se vandaag groot wurrn, harr ehr Leven woll‘n annern Dreih nahmen. Se besoch de Hauptschool in Schönemoor un harr geern den Afsluss in de Realschool oder Abitur maakt. „Mien Vadder meen, dat dee för‘n Deern nich nödig.“ Se harr dor van dröömt, up Architektin oder Dekorateurin to lehrn. „Du lehrst vernünftigen Kraam!“, disse Wöör van ehren Vadder hett se vandaag noch in ehr Ohr. Ehr Öllern harrn‘n Lebensmittelladen, un so broch ehr Vadder se as Lehrdeern in een „Feinkostgeschäft“ in Delmenhorst unner. „Dat weer nich dat, wat ik geern wull, man wat schull ik doon?“ In disse Tiet leep ehr bi een Veranstaltung de Student Rudolf Hoffmann övern Weg. Margret weer 18 Johr jung, as beide vör‘n Trooaltar gungen un een half Johr later de Söhn Burghard, nu 48 Johr oolt, up‘e Welt keem. So weer se eerstmaal Huusfroo un Mudder. Ehr Mann weer noch an‘t Studeern, un so hett se in Delmenhorst as Neihersche ehr Hannen röögt. „Ik heff mi hier allns sülfst bibrocht un ok bi mien Arbeitsstää dor noch veel tolehrt“, vertellt Margret Hoffmann. As de Kinner Henning, nu 37 Johr oolt, un Anna-Clarissa, nu 35 Johr oolt, up de Welt kemen, hett se ehr Arbeitsstää togäven. Se wull ja geern Architektin weern, un so leeg jümmer een Tekenblock bi ehr. Se broch Wahnhüüs to Papeer, de na ehr Dünken best weern. Dat Huus för de Familje is denn ok so boot wuurn, as se sik dat vörstellen dee. Na 12 Johrn as Mudder un Huusfroo wull Margret woller ehren Weg in de Berufswelt söken. 1991 fung se bi der Firma Tchibo an, un twee Johr later bi de Joghurtfirma Onken , un hier för den Deenst buten. 1997 wessel se na den Schokoladenmaker Hachez, un hier harr se een lange Tiet dat Leit för den Verkoop för verscheden Kuntreis. Siet‘n paar Johrn röögt Margret Hoffmann nu in kinen Beruf mehr ehr Hannen, un dit het se ok verdeent. Man dat grote Verpusten gifft dat för ehr nich, denn de Gaarn is ja dor. Just in de lesden Johrn is se dor rejell mit Füür bi. „Ik fung an, mine Ogen up annere Gaarns to richten, un siet 2014 bün ik Maat van de DDGL.“ Siet Januar 2018 liggt hier ok de Geschäfte - ehrenamtlich -in ehr Hannen, un so stellt se hier för de Maaten Vördräge un Exkursionen up de Been. In dat vergangen Johr wurrn Parks un Gaarns in Schweden besocht, un in dit Johr geiht dat in de „Toskana des Nordens“, in de Süd-Pfalz. Hier kaamt ok jümmer ne‘e Ideen in ehren Kopp, un de kann se denn in ehrn Gaarn umsetten. Bi ehr in de Schuuvlaad sünd ok al Pläne to finnen, ehrn Gaarn noch grötter to maken. Bi‘n Dag van de apen Gaarns brennt in ehr ok noch twee Füür. Se kann to‘n eersten de Lüüd ehren „Garten der Leidenchaft“ wiesen. Un to‘n tweeten: Se backt un kaakt bannig geern, un so gifft dat för de Besöker Koffee un – dat versteiht sik – sülfstbacken Koken. An‘n 15. un 16. Juni is dat woller so wiet, denn is Margret Hoffmann ehr Gaarn woller van Klock teihn bit Klock fief an‘n Namiddag apen. Wer an de annern Daag ehrn Gaarn sik ankieken will, de mutt bi ehr anpingeln.