• Jobs
  • Immo
  • Auto
  • Kleinanzeigen
  • Trauer
  • Hochzeit
  • Guide
  • Shop
  • Tickets
  • nordbuzz
  • Fußball
  • Werben
  • Kontakt
 
NWZonline.de Gartenzeit

Rudolf Tönjes wuß al as lüttjen Jung: Ik weer Gaarner!

18.05.2018

von dirk wieting

Ahn dat`n överdrieven deit, de Boomschool Tönjes höört to de ollsten Bedrieve in`t Kuntrei Weser-Ems. In`n eersten Weltkrieg hett Dietrich Voigt ut Nordenholz een Hauptmann kennenleernt, de blots een Thema kennen dee: Botanik. Dietrich Voigt leet sik van em begeistern un fung an, bi de Landwirtschup ok mit dat Anboon van Rosen un Bööm. 1942 hett sien Neffe Karl Tönjes den Bedriev övernahmen. Up Befehl van de Englänners mussen na den tweden Weltkrieg all Boomschoolplanten verneelt weern. Dar mussen nu Obstbööm för plant weern. Lebensmittel weern ja knapp. Karl Tönjes harr dree Kinner. As de jüngste Söhn Rudolf in`t Oller van fiev Jahr fraagt wurr, wat h

e is weern wull, keem dat as`n Schööt ut`e Pistol: „Papa… Gaarner un Jäger!“ Rudolf hett sien Woort holln. He hett twee erwachsen Döchter, is van Beroop Gaarner. In sien Freetiet is he Jäger ut Passion un ok Jagdhornbläser. As Schooljung al hett he sien Öllern in de Boomschool hulpen. Na den normalen Schoolafsluß hett he eers noch de Hannelsschool besöcht un nadem van 1956 bit 1959 de Utbildung bi Boomschool J.D. zu Jeddeloh. Dat kann nich schaden, wenn`n na`t Utbilden noch Erfahrn in Praxis sammeln kann. So hett Rudolf Tönjes bi`n Boomschool in Sleswig-Holsteen arbeit`t, nadem in Holland. In de bekannte Boomschool in de Neegde van Rotterdam wurr de bekannte Appelsort „Boskoop“ anboot. Disse Tiet in Holland ward Rudolf Tönjes nich vergäten. Binnen den Bedriev muß wägen dat deepe Moorkuntrei allns mit`n Boot schippert weern. Dat weer kien lichte Arbeit.

Plant weer ok noch een Tuur na England. Man van Huus keem Order: „Jung, wi bruukt di hier!“ Vadder Karl Tönjes weer krank wurrn un dat weer stuur, Fachmitarbeiter to kriegen. Paar Jahr later maak Rudolf de Meisterprüfung in`e Avendschool. „Dat weer garnich so lichtto. Daags sware Arbeit an`e frische Luft, s`avends up`e Schoolbank. Dar sünd mi faken de Ogen dichtfullen“, smustergrient Rudolf. He harr dat raakt mit de Meisterprüfung. Dat Utbilden van jung Gaarners wurr een Hartenssaak. Van 1969 bit 2005 hett he 65 junge Gaarners in „Fachrichtung Baumschule“ utbilden kunnt. Vääl van disse Lü hebbt nu een eegen Boomschool. Över vääl Jahrn weer Rudolf Tönjes ok in`n „Prüfungsausschuß für Gesellen- und Meisterprüfung“. He hett sik ok anners ehrenamtlich insett för sien Beroop, to`n Bispill in`n „Baumschul-Beratungsring Weser-Ems“ of in den „Arbeitskreis Baumschulforschung“.

Anfungen is Rudolf Tönjes dotiet mit`n Flaag van 2,5 ha för de Produktion. Vandagen sünd dat 12 ha. In all de Jahrn is de Boomschool Tönjes jümmers mit de Tiet gahn. Dat säker den Erfolg. Stütt un Stöön harr he dör sien Fro Marianne, de nu nich mehr läven deit. Vör 13 Jahr hett Dochter Silke Tönjes-van Tol tosamen mit ärn Mann dat Leit van dat Familjenunnernehmen övernahmen. „Opa Rudolf“ ward avers jümmers noch bruukt. So föhrt he 20 000 km in`t Jahr un leevert Planten ut. Wenn he is nich in`n Bedriev is, kann`n em up`n Golfplatz, up Jagd of in`e Runn van Frünnen finnen.

Beten wat över Rudolf Tönjes

Dat Öller: 77

Ik wahn in: Hude-Nordenholz

Familjenstand: Weetmann

Ik mag geern: Freden op disse Welt

Opregen do ik mi över: Ungerechtigkeit
un Lüüd de nich ehrlich sünd

An’n leevsten to äten: Allens wat op’n
Disch kummt

Dat kummt mi nich op’n Disch: Allens wat mit Knoblauch to doon hett

Dar fahr ik geern mal hen: Mien Fro un ik hefft veel von disse Welt sehn. Kanada hett us an besten gefulln

Mien Hobby: Jagd un Jagdhornblasen

An’n leevsten mag ik höörn: Slager –
ok geern oellere

Dat Book gefallt mi besunners goot:
Böker över Tiedgeschichte

Mien grötste Wunsch: Gesundheit un dat de Boomschool Tönjes duchtig wieter föhrt ward

Dat is mien Snack: Mi is elkeen Faarv
topaß, blots gröön mutt dat wä`en

Ton verstahn

Plattdeutsch                  Hochdeutsch

Kuntrei            Gegend

verneelen          vernichten

Schööt            Schuss

smustergrienen     lächeln

raken             schaffen

Weetmann         Witwer

Weitere Nachrichten:

Baumschule | Beratungsring

Ihre Meinung über 

Hinweis: Unsere Kommentarfunktion nutzt das Plug-In „DISQUS“ vom Betreiber DISQUS Inc., 717 Market St., San Francisco, CA 94103, USA, die für die Verarbeitung der Kommentare verantwortlich sind. Wir greifen nur bei Nutzerbeschwerden über Verstöße der Netiquette in den Dialog ein, können aber keine personenbezogenen Informationen des Nutzers einsehen oder verarbeiten.