• Jobs
  • Immo
  • Auto
  • Kleinanzeigen
  • Trauer
  • Hochzeit
  • Guide
  • Shop
  • Tickets
  • nordbuzz
  • Fußball
  • Werben
  • Kontakt
 
NWZonline.de Gartenzeit

Trixi Stalling: „Ahn minen Gaarn kann ik nich umto“

07.06.2019

De Gaarn van dat Ollnborger Slott (16 ha) un ok dat Eversten Holt (22 ha) sünd in Ollnborg dat, wat wi de „gröön Lung“ nöömt. Un hier maakt ok all Ollnborger un ok de Gäste van de Stadt geern‘n lütten Gang. Dat de Minschen bannig geern in‘n Gaarn van dat Slott un na dat Eversten Holt kaamt, dat is to‘n groten Deel ok dat Verdeenst van Trixi Stalling. Dat sünd nu al 13 Johr, dat disse Gaarn un dat Holt in ehre Hannen liggt. Snackt man mit ehr, so markst du foors, dat se heel un deel un mit veel Leevde in ehren Beruf to Huus is. „De Gaarn van dat Slott is för Jung un Oolt dor. De lütten Kinner un just so de Olen köönt an elkeen Dag un to all Tieden van dat Johr hier de Schönheit van de Natur geneten“, vertellt Trixi Stalling mit lüchten Ogen. Al as lütt Kind weer bi ehr, in‘t Ammerland upwussen, de Leevde to de Natur dor. „Wi hefft in Borbeck an‘n Rand van een Wald wahnt, un disse Wald weer för us de beste Stää to‘n Spälen.“ Al in jungen Johrn harr se‘n egen lütten Gaarn, wor se sülfst ehr egen Grööntüüch to‘n Wassen broch. Weer se just nich in dat Holt oder in‘n Gaarn, denn weer se bi de Päär to finnen. As Kind wuss se nipp un nau, wecke Beruf för ehr de rechte weer: „Ik will Pastorsche weern“. „As Kind harr ik den Gloven, dat de Pastoren bloots an‘n Sonndag wat to doon harrn“, vertellt Trixi mit een lachen Gesicht. Later is se denn dor achter kamen, dat dat woll doch‘n beten anners is; un so lehr se, as se de Realschool achter sik harr, bi dat Forstamt Neeborg up „Forstwirtin“. De Lehrherr leet ehr marken, dat he van Froolüüd in dissen Beruf nich veel weten wull. Faken moss just se de Arbeiten maken, de besünners swoor sünd; wull he Trixi so doch wiesen, dat een Froo in dissen Beruf nix to söken hett. Mit veel Hartbloot un mit veel Leevde to de Natur kunn se de Lehrtiet achter sik bringen, as de Beste in ganz Nedersassen! Ehr Beruf broch se na den Gaarn van dat Ollnborger Slott, hier röög se ehr Hannen as „Forstwirtin“. Mit ehren Fründ, mit den se to de Tiet tohoop weer, wull se een egen Görneree up de Been stellen. Un so lehr Trixi Stalling noch up „Gärtnerin in Fachrichtung Garten- und Landschaftsbau“. „Dat hett mi best gefullen, harrr ik doch in mien Lehrjohr veel mit de Pleeg van de Bööm to doon, un Bööm sünd mine Saak“, vertellt Trixi Stalling. Na de Lehrtiet wull Trixi Stalling wat van de Welt sehn, un se sä to „Old Germany“ Tschüss un gung för een Johr na Neuseeland. Up een groot Blomenfarm harr se hier Arbeit funnen. As se torüchkeem, gung dat för ehr an de ole Arbeitsstää wieter. Bi een Snackeree mit ehren Chef meen se, mit‘n lütt Smustern: „Kummt de Dag, un Se gaht in Rente, denn is Ehr Job mien Job!“ Sien Antwoort: „Denn hool di man ran!“ Doon is‘n Ding! An‘n Dag harr se ehr Arbeit in‘n Gaarn van dat Slott, un na Fieravend keek se in de Böker för dat Abitur. Mit dat Abitur in de Tasch studeer se veer Johr lang up „Landschaftsarchitektur“ in Osnabrück. In de Studeertiet moss se ja ok dat Nödigste to‘n Leven hebben, un so hett se ok noch in een „Werbeagentur“ warkelt. De Diplomarbeit schreev se, dat versteiht sik, över den „Oldenburger Schlossgarten“. 2006 gung ehr Kolleeg, de dat Leit van‘n „Schlossgarten“ harr, up‘t Olendeel. Een ne‘e Baas weer nödig. Trixi Stalling kunn sik döörsetten. So weer dat Wirklichkeit wurrn, wat se bi de Snackeree mit ehren olen Chef al seggt harr. In de lesden 13 Johrn hett Trixi Stalling veel up‘n Weg brocht: Ne‘e Planten, to‘n Bispill ole Obstbööm, oder ok‘n Barg Veranstaltungen för all Lüüd. Is Fieravend, geiht dat in‘n egen Gaarn wieter. „De Gaarn, dat is mien Leven. Ahn minen Gaarn kann ik nich umto. Anner Lüüd koopt sik Taschen un Schooh, ik koop mi Planten för minen Gaarn.“

Meine Themen: Verpassen Sie keine für Sie wichtige Meldung mehr!

So erstellen Sie sich Ihre persönliche Nachrichtenseite:

  1. Registrieren Sie sich auf NWZonline bzw. melden Sie sich an, wenn Sie schon einen Zugang haben.
  2. Unter jedem Artikel finden Sie ausgewählte Themen, denen Sie folgen können.
  3. Per Klick aktivieren Sie ein Thema, die Auswahl färbt sich blau. Sie können es jederzeit auch wieder per Klick deaktivieren.
  4. Nun finden Sie auf Ihrer persönlichen Übersichtsseite alle passenden Artikel zu Ihrer Auswahl.

Ihre Meinung über 

Hinweis: Unsere Kommentarfunktion nutzt das Plug-In „DISQUS“ vom Betreiber DISQUS Inc., 717 Market St., San Francisco, CA 94103, USA, die für die Verarbeitung der Kommentare verantwortlich sind. Wir greifen nur bei Nutzerbeschwerden über Verstöße der Netiquette in den Dialog ein, können aber keine personenbezogenen Informationen des Nutzers einsehen oder verarbeiten.