• Jobs
  • Immo
  • Auto
  • Kleinanzeigen
  • Trauer
  • Hochzeit
  • Guide
  • Shop
  • Tickets
  • nordbuzz
  • Fußball
  • Werben
  • Kontakt
 
NWZonline.de Nachrichten Kultur

Fortsetzungsroman: „Düsterwater“ Teil 20

04.04.2017

Oldenburg Neeschierig harrn sük buten vör dat Huus en Rieg Nahbers ansammelt, de mitkregen harren, dat de Polizei bi Kuhlmanns weer, un nix verpassen wullen. Gerda Wolken weer mit darbi.

Een ganze Tied later kemen de Beamten mit en Kiste na boben, de ok in in de Keller good versteckt wesen weer. De Beamte weer noch nich ganz bi de Dör, as Mariechen wat blenkern sehg.

„De Talismann kenn ik nich“ un ehrder well ingriepen kunn, harr Mariechen dissen al nohmen un leep dormit gau na buten vör de Huusdör, um hum bi Lücht to bekieken. Darbi weer se in den Neegde von Gerda Wolken kaomen.

Gerda Wolken wurr kriedewitt. „Wo hest du de her?“ De Stimm överslog sik bold. „Dat is, dat is  . . . .de Talismann van mien Andreas. Wat hest du mit mien Andreas maakt!“ De Beamten mussen hör fastholln, anners weer se up Mariechen losgahn.

Kriminalassistentin Tamm keem darto. „Fro Wolken, sünd se seker, dat disse Talismann van ehrn Keerl is?“

„Jo, jo, dat bün ik. Afsolut seker. De hebb ik hum to us Verlööfnis schunken.“ Se snuckerde. „De schull hum doch Glück brengen. Kieken se hier, dor unnern is ganz lüttjet mien Naam ingraveert.“ Tranen leepen hör övert Gesicht. „Wat hest du mit mien Andreas maakt?“

„Nu beruhigen se sik maal, Froo Wolken“, sä Kriminalassistentin Tamm un truck hör mit sik na een van de Polizeiwagen.

-----

Se harr nich mit de Polizei snacken schullt, nu weer se dran. He tövde wedder an de Stee, wor hum nümms sehn kunn un överlegde, wo he dat anstellen schull, hör to’n Swiegen to brengen. He verjagde sük, as de Wagen dat ersde Maal keem, un harr sik jüst noch achter de Müür versteken kunnt, ehrder he in dat Lücht van de Schienwerfer keem. Siet de XY-Sendung föhrde de Polizei all Stünn langsam dör de Straat. Jüst weer de Wagen wedder vörbi. Een Stunn weer genoog Tied, hör to’n Swiegen to bringen. He keek sik na all Sieden um, anners weer alls düster. Nümms op de Straat, de Fenster in de Husen weern all düster. Dat weer sien Schangs, nu oder gor nich.

Liesen sleek he na dat Wahnhus, keek sik um. Nümms druff hum sehn.

-----

As Mariechen un Jens wedder alleen weern, weer Hannes jümmers noch nich to Huus.

„Papa is vandaag over lang unnerwegens“, meende Jens. „Glövst du, dat he mit disse Saak wat to doon hett?“

„Dien Papa hett nix dormit to doon.“

„Worum weer de Polizei denn hier un hett alls dörwöhlt? Dat maakt de doch nich eenfach man so.“

„Dat weet ik ok nich“, see Mariechen. „Dor mutt well wat gegen hum hebben, anners kann ik mi dat nich vörstellen. Laat us man erstmaal up de Schreck en fein Koppke Tee drinken, denn sehn wi wieder.“

„Ik bruk erst maal en Snaps“, Jens harr sük de Buddel haalt un erst maal en groten Sluck nohmen.

„Man komisch is dat al, dat Papa sik nich mellt un dat he jümmers noch nich wedder hier is.“

„Dat verstah ik ok nich, hopentlich hett he kien Malöör hatt“, meende Mariechen.

-----

De Kuhlengravers harrn dormit to doon den sworen Sarg na baben to halen. Dat Graff von Heinrich Kuhlmann weer dör een Band van de Polizei afsperrt.

„Nu kummt de Wohrheit an’t Licht“, meende Küster.

„So oder so, glieks weten wi, of wi richtig liggen mit us Vermoden oder nich.“ Glöckner keek to den Gerichtsmediziner, de al in Positschoon stunn un tokeek, wo de Sarg langsam wedder baben de Eer keem.

Denn weer’t sowiet un de Sarg keem open.

„Un wat is nu?“ Küster stunn direktemang achter den Gerichtsmediziner.

„Op jeden Fall hebben wi dat hier mit twee Doden to doon.“ „Un köönt se anners noch wat seggen?“

„Nee. De Sarg mutt mit in de Pathologie. Ik kann blot seggen, dat dat twee sünd. Alls annere, se weet, miene Herren. Dat sülbige, wat ik anners ok jümmers segg“, griende de Gerichtsmediziner Höfer.

„Man för dissen Fall is dat besünners ielig, wi bruukt de Ergebnisse“, versöchde Küster dat noch mal.

„Jo, un wenn’t geiht al güstern“, full Glöckner in.

„Dat durt sien Tied. So lang mutt de Chef sik al gedüern, so as jümmers“, griende Höfer, packde sien Saken tohop un winkde hör noch mal to.

Een van de Schendarms, de dorvör oppassde, dat de neeschierigen Lü nich to dicht an dat Graff keemen, leep up Glöckner und Küster to.

„Komen Se gau. De Kriminalassistentin Tamm hett sik jüst mellt. Dor is een verswunnen. Ik hebb de Naam nich so richtig mitkreegen.“

-----

„Ik koom jüst van de Karkhoff, un du glövst dat nich, wat dor los weer.“ Emma Bruns weer ganz ut de Pusde. „Wenn ik dat naher Anna vertell un erst in’t Heim...“

„Wat gifft Nees? Hest du wat sehn kunnt?“ wull Alwine weeten

„Also, dat harr ik nie nich docht. Stellt jo mal vör, de Karkhoff weer vull van Polizei. Se hebbt Heinrich Kuhlmann wedder na boben haalt...“

„Dat heff ik al hörd. Schad, dat ik hier nich weg kunn, anners... Wieder, Emma, wieder“, keem dat van Alwine, de för Neeschier bald platzt weer.

„Laat mi doch erst mal to Verstand komen. Also, dat weer so. De Sarg weer boben un denn stunnen de dor all um to ...“

„Nu kumm doch ennelk mal to Pott!“

„Jo, jo.Sehn kunn ik dat ja leider nich. Also, stell di vör: Dat is de Sensatschoon: Twee Dode in een Sarg!“

Fortsetzung folgt

Meine Themen: Verpassen Sie keine für Sie wichtige Meldung mehr!

So erstellen Sie sich Ihre persönliche Nachrichtenseite:

  1. Registrieren Sie sich auf NWZonline bzw. melden Sie sich an, wenn Sie schon einen Zugang haben.
  2. Unter jedem Artikel finden Sie ausgewählte Themen, denen Sie folgen können.
  3. Per Klick aktivieren Sie ein Thema, die Auswahl färbt sich blau. Sie können es jederzeit auch wieder per Klick deaktivieren.
  4. Nun finden Sie auf Ihrer persönlichen Übersichtsseite alle passenden Artikel zu Ihrer Auswahl.

Ihre Meinung über 

Hinweis: Unsere Kommentarfunktion nutzt das Plug-In „DISQUS“ vom Betreiber DISQUS Inc., 717 Market St., San Francisco, CA 94103, USA, die für die Verarbeitung der Kommentare verantwortlich sind. Wir greifen nur bei Nutzerbeschwerden über Verstöße der Netiquette in den Dialog ein, können aber keine personenbezogenen Informationen des Nutzers einsehen oder verarbeiten.