• Jobs
  • Immo
  • Auto
  • Kleinanzeigen
  • Trauer
  • Hochzeit
  • Guide
  • Shop
  • Tickets
  • nordbuzz
  • Fußball
  • Werben
  • Kontakt
 
NWZonline.de Nachrichten Kultur

Fortsetzungsroman: „Düsterwater“ Teil 21

04.04.2017

Oldenburg „Dat heff ik doch gliek seggt, de Kuhlmann hett wat dormit to doon“, sä Willi Meyer un sloog sik tofreden op de Borst.

„Wat ik al seggt hebb, wat ik al seggt hebb“, full Alwine fuurts wedder mit in.

-----

„Wo kann dat angahn? De Kollegen schullen Lisa Schoone doch in Oog hollen. Sünd de nich all Stünn dör hör Wahnstraat fahren?“ wull Glöckner weeten.

„Doch, sünd se, man se hebbt nix Verdächtiget sehn“, sä KA Silke Tamm.

„Verdammt! Dat harr nich passeern drufft“, flööckde Glöckner, de dat nich faten kunn.

„Vandag is Lisa Schoone nich na de Arbeid komen, dat Telefon gung ok nich. Ik hebb denn futt hör Fründin Thea anropen.“

„Un dor weer se natüürlich ok nich“, meende Glöckner.

„Nee, aver Thea hett en Slötel för de Wahnen un wi sünd tohop dor henfahren. De Slötels harrn wi nich bruukt, de Dör stunn open. In de Wahnen is mi nix besünners opfulln, blot dat Telefon leeg up’n Bodden. As wenn se in Panik komen un weglopen weer.“

„Köönt wi faststellen, mit well se tolesd snackt hett, is dor en Nummer in dat Display?“

„Nee, de Nummer wurr unnerdrückt. Unbekannt.“

„Hebbt se sik buten umkeeken?“

„De Kollegen to’n Sporensekern sünd al unnerwegens. Achtern Hus hebbt wi hör Halsdook funnen un dor weer ok so’n beten Blood.“

„Wat is mit de Nahbers, hebbt se de al fraagt? Hett dor well wat sehn of hörd, wat us wiederhelpen kann?“

„Dor wull ik jüst mit anfangen“, sä Kriminalassistentin Tamm.

„Na, denn aber en beten zackig.“

-----

De Polizeibeamten stunnen wedder vör de Huusdör van Hannes Kuhlmann.

„Froo Kuhlmann, is Hör Keerl tohuus?“ wull Glöckner weeten

„Nee. De is nich dor“, sä Mariechen.

„Köönt Se us seggen, wor wi hum finnen köönt?“

„Nee, kann ik nich. Dat wüss ik süllst gern. Wat willt Se denn al wedder hier? Ik hebb Se doch al dat lesde Mal seggt, mien Hannes hett mit de ganze Saak nix to doon.“

„Froo Kuhlmann, wi hebbt de dringende Verdacht, dat Hör Keerl Andreas Wolken un Piet van Oldendorp umbrocht hett. Wi hebbt en Haftbefehl.“

„Tüünkraam, mien Hannes hett nümms umbrocht! Un nu gahn se beter we’er . . . .“

„De Spuren seggt wat anners. Wi hebbt nu Bewiesen. Wenn sik Hör Keerl mellen schull, mutten Se us sofort verstännigen, anners maken Se sük strafbar.“

„Ik weet würrelk nich, wor he is“, sä Mariechen. „De is al lange Tied nich na Hus kaamen, man dat ik jo ok kien Wunner. Dorbi dee ik dat ok mit de Angst kriegen.“

„Denn geven wi nu de Fahndung rut.“

-----

Lisas Kopp kellde düchtig. Se sehg alls as dör Dook. Se wull sik bewegen, man dat gung nich. As wenn se fast inpackt weer. Man dat kunn nich angahn. Dat muss en slechten Droom wesen. Se blinkerde. Doch, dor weer Plastik um hör to, dör en lütten Spalt keem noch en beten koole Luft rin.

Dat Telefon harr pingeld. Kriminalhauptkommissar Glöckner mellde sük.

„Froo Schoone, ik weet, dat is laat. Ik dee Se ok nich stören, man dat is nu to gefährlich in hör Wahnen. Se mutten sofort dor ruut. Treken sik wat över un komen se runner. Dor is well op de Balkon. Kieken se nich ruut. Gahn Se futt runner...“

„Alleen? Schall ik nich beter binnen blieven?“ harr se noch fragt.

„Up gor keen Fall, laaten se alls stahn un liggen un komen Se na unnern. Un denken Se daran, blot nich dör de Huusdör, gahn Se achtern ruut.“

Jüst in dissen Ogenblick weer en luut Pultern to hören. De Nood kroop in hör hoch, hör Stimm wull nich mehr. Se krächzde: „Ik koom“, un leet de Hörer eenfach so fallen.

Mit bevern Beenen gung se na unnen. Se weer achtern ruut un denn wüss se nix mehr. Un nu leeg se hier un kunn sik nich rögen. Un alls um hör to weer swart.

Dat rook na Moor, un se meende, dor plätscherde wat. Legg se bi ’t Water? Hörde se en Aantje oder weer dat blot Inbillen?

De Koppien sette hör to un se dusselte wedder weg.

-----

Worum harr se ok mit de Polizei snackt. Dat harr se sik süllst totoschrieven. He harr hör dor liggen laten. Dat weer nu ja ok eendoon, he harr nix mehr to verleern. Dat weer beter gahn, as he docht harr. Se weer fein na unnern komen un hum direktemang in de Arms. Dat Halsdook weer runnerfullen, man dat maakte nu ok nix mehr ut, dormit kunnen se ok nich veel anfangen. Harr gor nich beter lopen kunnt.

He harr sik de Kapuze deep in’t Gesicht truken. Denn weer he kört in en Supermarkt in Ollnborg wesen un harr sik ’n beten wat to äten un to drinken haalt. Nu fuhr he in en Wald un maakde sük dat in de Geländewagen kommodig. He weer heel möi un bruukde nödig en Mütz vull Slaap.

-----

Forstmeester Eduard Blanke maakte smörgens fröh de Runde in sien Revier. De Geländewagen harr güstern ok al dor stahn. Man do harr he sük noch nix dorbi docht. Woso stunn de jümmers noch dor? In dat Lücht van sien Taschenlamp bekeek he den Wagen. Keem jo of un an mal vör, dat well sien bruukt Auto eenfach so in en Wald entsorgde. Hm, de TÜV leep erst in acht Maand af.

As he in dat Auto rinlüchde, kunn he well op de Rücksitzbank liggen sehn. Na, de wull he mal wat vertellen.

Fortsetzung folgt

Meine Themen: Verpassen Sie keine für Sie wichtige Meldung mehr!

So erstellen Sie sich Ihre persönliche Nachrichtenseite:

  1. Registrieren Sie sich auf NWZonline bzw. melden Sie sich an, wenn Sie schon einen Zugang haben.
  2. Unter jedem Artikel finden Sie ausgewählte Themen, denen Sie folgen können.
  3. Per Klick aktivieren Sie ein Thema, die Auswahl färbt sich blau. Sie können es jederzeit auch wieder per Klick deaktivieren.
  4. Nun finden Sie auf Ihrer persönlichen Übersichtsseite alle passenden Artikel zu Ihrer Auswahl.

Ihre Meinung über 

Hinweis: Unsere Kommentarfunktion nutzt das Plug-In „DISQUS“ vom Betreiber DISQUS Inc., 717 Market St., San Francisco, CA 94103, USA, die für die Verarbeitung der Kommentare verantwortlich sind. Wir greifen nur bei Nutzerbeschwerden über Verstöße der Netiquette in den Dialog ein, können aber keine personenbezogenen Informationen des Nutzers einsehen oder verarbeiten.