Horum - Sünd dat de lecker Schinkstücken – of is ’t dat mitnanner wesen um to snacken? De plattdüütsch Klöönsnack in de oll Mulkeree „Freeslandsteern“ weer Sönndagavend utverköfft un is dat tokomend Sönndag ok weer. Kröger Bernhard Eden wull de Klöönsnack al togeven, he kann nich mehr so, see he. To Huus herumsitten kann he ok nich. Minnerseert hett he sien Vereensleven van 52 Verenen up een Hand vull.
De plattdüütsch Klöönsnack weer ok en Torüggdenken an de Tied, waar de Minsken van mörgens bit avends puckeln deen un kien Freeitied harren, aver na vörn keken un sük sülvst hulpen. Waar de Chor „Likedeelers“ ut Horumersiel is, gifft dat Shantys un dat geiht d’ r rund. Se sungen van de wiede Welt un as dat in de Seefahrt fröher weer. Hartwig Harms, de Baas van de Chor, vertell de Lüü wat un een of anner sung ok maal mit.
„Well twee Spraken snacken kann, is keen Dööskopp, glööv dat man“, vertell Meike Baumann ut Schörtens, de to ’n tweede Maal daarbi weer un för uns Moderspraak leevt. För disse Avend harr se en Hoogdüütsch Riemsel up Platt upseggt. In d’ Kinnertied seggt man: „Dat kannst du ja al!“ Daarna heet dat „Kannst du dat noch?“ un uplest „Geiht dat noch?“. Mit Woorden van Ewald Christophers geev se de Raad „De Wind mutt weihen, ok maal van vörn, dat maakt een fast un hart, aver: Dreih Di nich na de Wind!“
Ut hör Kinnertied in Hoogkarken vertell Karin Eilers, de in Jever en Görner heiraadt hett un nu as Rentnerske in Cleverns wohnt. Hör Vader was in d’ Krieg bleven un „Unkel Heino“ gung hör Moder to Hand. Nett as Kinner sünd, is se in dat hele Dörp rund west un hett vertellt, se kreeg en neei Vader. Snaps wurr brannt un swart slachten deen se ok. Mesters harren dat froher ok stuur. För 50 bit 60 Kinner geev een Mester Unnerricht för veer Jahrgangen in een Klass, un de Kinner hebben daar ok noch düchtig wat bi lehrt.
As Almke Gerken noch Baas van de Landfroolüü van de Kuntrei Ollnbörg was, hett se bi de Bundespräsident up Platt snackt, de antwoordde ok up Nedderdüütsch un weer blied, dat dat Lüü gifft, de noch Platt köönt. „Moin“ of „Goden Dag“ to seggen word minner bi de Kinner, daar stunnen froher de Mester un de Pastoor achter. Düchtig wat to ’n Lachen geev dat van Wieland Rosenbohm. In sien lebennig Aard un Wies vertellde he up Plattdüütsch over de Weltpolitik un natürelk over Donald Trump. Mit de modeern „Kommunikationstechnik“ kennt he sük neet ut. Daarför hett he an en Besökerin sien Version van en „Ei-fon“ wesen, dat weer een striekeln an de Hand.
