Horum - Siet 28 Jahr gifft dat de Plattdüütsch Klöönsnack in Horum in de oll Molkeree. Lest Sönndag um 19 Ühr harr Bernhard Eden weer nöögt, un mit över 160 Lüüd weer de Saal so vull, dat nich all, de sük anmellen wullen, komen kunnen.
Kröger Eden weer düchtig blied över de Kinner van d’ Tetta van Oldersum-Grundschool ut Tettens. Se wesen in dat lüttje pattdüütsch Theaterstück „Wiehnachtsgeld“, wo de nümig Fritz sien Vader Geld för de Wiehnachtsmarkt in Hoogkarken ofknöpen deit.
Suntke Buß, Ilvi Fischer, Joris Fürstenwerth, Efke Kollmann, Rieke Mammen un Nieke Schimack harren dat Stück för dissen Avend gau in een Maant inöövt, see Renate Reck ut Cleverns. Siet dat Vörjahr maakt se in Tettens de Arbeidsgemeenskupp „Plattdütsch“ un bedankt sük bi all de Lüüd, de mit hör Besöök helpt, dat d’r Geld över blifft för Böker un all de anner Kraam för de Plattdüütschstünn. Se vertell de Lüüd, dat se de Kinner verklaart harr, dat Plattdüütsch maal de Weltspraak van de noordeuropäischen Kultur- un Handelsrumen weer.
Lüüd in Swung
Un denn sungen de Kinner tosamen mit hör Schoolmesterske Janna Reck, de ok dat Seggen hett an de School, dat Leed van de Wiehnachtsbackeree, un de Lüüd kemen so recht in Swung.
Joris lees ok noch de Geschicht van dat Feverthermometer vör, mit de he d’ 1. Pries bi dat Vörlesen in Freesland wunnen harr. De Lüüd gefull dat, se klaschden düchtig un weren blied, dat dat noch Kinner gifft, de up Platt wat upföhrt – un de Kinner, de willt tokomen Jahr weer mitmaken. In Tettens löppt dat, beloov Eden de School un beduurde, dat in de Scholen to wenig maakt word, Plattdüütsch in de Olldag intobrengen.
Na d’ Vesper mit Tee, Brood, Botter un lecker Schink stell de Kröger de Lüüd vör, de an disse Avend wat to seggen harren. Ut Wangerland weren Almke Gerken un Wieland Rosenbohm daarbi. Toreist weren noch Maike Baumann ut Schörtens un Hermann Hohlen ut Rohrdum.
Vör 30 Jahr al mook Hermann Hohlen bi Bernhard Eden in Horum mit sien Handörgel Musik, un Sönndagavend sungen de Lüüd mit hum Wiehnachtsleder. De Dööntjes an disse Avend weren up Platt, man se weren nich platt. Mennigeen hett nickköppt un dacht: So weer dat bi uns ok.
Almke Gerken vertell in en Gedicht van Eduard Ohmstede, wo eenfach de Geschenken fröher weren, meest wat to ’t Antrecken un en bunte Teller mit Appels, Nöten un wat Sööts för all tosamen. Dann vertell se noch van de neeimoodske Kripp, de de Pastor in de Kark för de olle Kripp upstellen laten harr un de Lüüd gaar nich gefull. Se weren in ’t Dörp kört of mit de Pastor, un eerst as de Karkendener hüm vertell waarum, un de olle Kripp weer in de Kark stunn, änner sük dat.
Eerst na de Kark
Mit „De brune Schimmel“ van Rudolf Kinau erinner Meike Baumann vööl Tohörers an hör Schooltied, wo de Mesters disse besinnlich Geschicht in d’ schummrige Mörgenstünn in de Adventstied vörlesen hett. Meike Baumann vertell ok, dat dat fröher eerst na de Kark gung, in Huus noch över de Kaark snackt, eten un daarna düchtig sungen wurr, un dann kunnen de Geschenken utpackt weren.
Wieland Rosenboom erinner mit Geschichten van Remmer Meents ut Clienensiel an de Nood van de 13 bit 14 Millionen Minsken, de ut hör Heimat ut Oostpreußen, Schlesien un dat Sudetenland wegjaggt wurren. En Tostand, de wi nu weer mit anner Minschen beleevt.
Wiel dat in de Winter 1946 so kold weer un de Flüchtlingen in hör Behelpswohnens nix to anböten harren, hebbt se in Schillig över Nacht dat Holt van de Diekschoort utboot. He vertell ok van de Buur, de na de Kaarkbesöök de Lüüd wat brocht hett, de in hör Noodunnerkummst Wiehnachten mit ganz minn Eten un Drinken ohn Geschenken fierden.
Wieland Rosenboom de körtens van uns Bundespräsident utteekend wurr vertell, dat he mit hüm in Bremen Platt snackt har.
