Dei Pottflicker Jop Rosskamp ut Bassel möss in fräuher Tieden naot Amtsgericht Friesaithe as Tüge – siet 1974 is för use Gägend nu Cloppenborg taustännig.
Taun Beginn frög dei Amtsrichter so allerhand tau sien Person. Hei wull sien Öller wäten, wat hei arbeiten dö, sien Ehestand un taulessde frög hei nao sien Glooben.
„Wat mennt Gi dormit, Herr Amtsrichter“, sä doruphen Jop.
„Auf welches Glaubensbekenntnis sind Sie getauft worden, Herr Rosskamp?“
„Menschk, Herr Amtsrichter, dor wät wi up’n Lanne doch nicks nich van. Gi käönt dorvan utgaohn, dat Sei un ick den sülwigen Glooben häbbt. Nu is dat aower langsaom uck naug – mit dei Fraogerei.“
„Aber Sie müssen doch wissen, ob Sie katholisch oder evangelisch getauft sind? Sie sind aber doch ein gläubiger Christ?“
„Jao, dat is woll richtig. Ick gaoh gelägentlick Sönndags nao Karken un dor häbb ich Jau uck all maol seihn. Dorüm meen ick, wi twei glöwt seker dat süfftige, Herr Amtsrichter.“
„Ja, aber Sie haben doch sicherlich schon einmal etwas von Dr. Martin Luther gehört, Herr Rosskamp?“
„Mien Läwdag noch nich, Herr Richter. Wenn bi us in Huuse ein krank is, roopt wi bi Dr. Hülper an, dei kummp forts, Daogestied un uck inne Nacht!“
