Wu man sülvst mit de grood Hitt ümgaahn kann un up wat för een Aart de Planten in ’n Gaarden versörgt word, dat word in dissen Sömmer faaken bekaakelt. Ennen Juli, as ’t so reell heet wär, vertell mi een Keerl, dat he naast naa Fieraabend noch ’n Bült to don har, un spren-gen muss he ok noch. Wat he sprengen muss, sä he nich, dorüm froog ick, of he dormit sien Raasen meen. Ja, de wull he fein grön hemmen.
Ick kunn mi ’t nich verkniepen to fraagen, of he denn een ganz besünnern Minsch is, de in disse schlimm drög Tied noch moi grön Gras in sien Tuun hemmen moot. Ick glöv, dissen Keerl weet dat Waater woll erst to wertschätzen, wenn ok för üm de „grood Pütt“ los is un Waater bloß noch todeelt word. Up jeden Fall käm dorüm för mi een Idee, doröver to schrieven, wu Minschen mit disse Hitt un de Drögd ümgaaht.
Ut mien Frünnenrunn vertell mi een, dat sien bold negentig Johr old Moder noch jedet affangen Waater ut eer Köken un Baadstuuv in een Emmer sammelt, üm dat an Planten, Strüük un Bööm to geten, de ’t nödig hebbt. Wiederhen vertell he ok, dat Moder Emmi all in jünger Johrn up ’n Buernhoff dat wehnt wär, Waater ut ’n Kuhl oder ’n Schloot för Minsch un Veeh ruttoholen. Wat dat för ’n stuur Wark wär, könt de meesten Lü sick vandaag woll nich vör-stelln, worbi dat ja ok in de koll Wintertieden wen muss. So sä he denn ganz gedankenvull: „Man hätt alltied markt, wu se dat kostbor Natt achten deit.“
Ick sülvst hebb van ’t Öller her nich süchse Tieden belevt, aaber ick fang ok jedet Waater up, üm dormit buten to geten. Aaber ick hebb intüschen up Befraagen rutkregen, dat annern dat ok maakt. Geern gaaht de Minschen bi disse heet Temperaturen in ’t Schwemmbad oder in Baadkuhlen, üm sick moi aftoköhlen oder stellt sick ünner een koll Bruus. Ick find dat ok besünners frisch, mi mit koll Waater to waschen un kann mi besinnen, dat mi 1959 in de gewaltig heet Tied mi maal raaden word, mien Ünnerarms tüschendör in koll Waater to holln. All wat moi köhlig is, word ja geern annaahmen, of ’t een köhl Ies, Beer, Kribbelwaater oder anners een gemengselt Drinken is.
Van veel öllere Lü hebb ’k mi särgen laaten, dat se bi de Hitt gor nich naa buten gaahn sünd. In de heet Nachten hätt `n ja ok Probleme, good dörtoschlaapen oder överhaupt in ’n Schlaap to kaamen. Dor schölt woll de Schlaapkaamern boven in de Hüüs noch mehr Probleme maaken. Ick weet van een jungen Keerl, de hätt sick in ’t Besinnen an Moder ’s natt Waadenümschläg bi Fever mit ’n natt Handdook dat Inschlaapen lichter maakt.
Up mien staadig Radtouren kaam ick ja ok an totaal bruun Weidland vörbi. De Buern könt man nich eben mit ’n Sprenger dat bruun Weidland to een Grönland maaken. Dat wär säker nich anbrocht bi so ’n legen Grundwaaterstand. Bi all dat, wat sick in de letzt Johrn van ’t Klima her deit, moot uns woll kloor wen, dat de Minschen in de grood Industriegesellschkop veel süniger leven schulln. Ick glöv, wenn de all ’n bäten mehr in Richt van Oma Emmi levt harn, gevt woll nich all disse un up uns noch tokaamend Probleme.
