John D. Rockefeller, die „Oueljebaroon“, is däälich noch bekoand as die riekste Mon, die ooit ap ju Waareld lieuwed häd. Do riekste Ljuudene fon uus Tied hääbe wäil moor Dollars as Rockefeller, man wan me ju Inflation oureekent, dan rakt et bit nu neemens, die Rockefeller aphoald häd. Un wan me sik dan noch foarstält, dät et tou Rockefeller sien Tieden noch goar neen Läst ap dän Fertjoonst roate! Dät hat, die oolde Rockefeller kuud sien Milliarden man so aptoudenje. Hie häd deer sillärge neen Dait Läste foar betoalje moast. Foar sin Riekdum hääbe wie heel un aal naan Begrip.
Diogenes, die Filosoof, waas aan fon do äärmste Moanskene appe Waareld. Hie hied neen Kloodere an ’t Lieuw, hie wüül dät uk nit uurs. Hie hied bloot aan hoolwe Flaaskappel tou Woater skäppen un een Fät, wier hie ien woonde. As hie insen saach, dät aan Huund uk sunner Behälp Woater suupe kuude, häd hie uk dän hoolwe Flaaskappel wäächsmieten un bloot dät Fät hoolden.
Uur Diogenes wäd fertäld, dät hie niks hääbe wüül un deermäd heel un aal toufree waas. Hie hied uk neemens of niks wät in ’t Reeken. As eenmoal Alexander die Groote him ätter aan Wonsk fräigede, ontwoudede hie bloot: „Gung mie tou de Sunne uut!“
Diogenes hied noch nit wiete kuud, dät hie mäd sien Fät goar nit so fier fon Rockefeller oowe waas. Foar bee, Diogenes un Rockefeller, „stoant dät Fät foar dän Fersäik, ap dusse Waareld bliede tou wäiden. Rockefeller died deer Ouelje ien, Diogenes sik säärm“ (Peter Bamm).
Man dät Fät häd, fon Diogenes un Rockefeller ousäin, in fröiere Jierhunnerden een groote Karriere bääte sik häiwed. Wät waas wäil ju Hanse sunner dät Fät! Sunner Feete neen Hanse, sunner Hanse neen Hieringe. Un wo hieden do wäil toufoarne uurs transportierd wäide kuud as in Feete! Feete wieren do „Containere fon dät Middeloaler“ (Ernst Schubert). Sunner kjo geen fröier niks.
Un wan do Feete do Containere fon dät Middeloaler wierne, hat dät fonsäärm, dät do Containere do Feete fon ju Näitied sunt. Däälich gungt je niks moor sunner Containere.
Do Skipfierdere wieten oafte goar nit gjuchtfäidich, wät in do Containere iensit. Man wan me akkeroat waikikt, is dät Fät nit heel un aal fon dän Bieldeskäärm ferswuunen: Ouelje wäd uk däälich noch in Feete transportierd, uk wan do nu „Barrel“ heete.
Noomen annerje sik, do Seeken blieuwe dosälgen. Rockefeller mai sik hoagje, Diogenes waas ’t seeker juustgliek.
