Bewegen bringt Segen – un Sport besünners! Dor is wat an. Villicht denn nich, wenn ’n ’t to overmodig överdreven worden is un irgendwat dorbi an ’t Liev Schaaden naahmen hätt un in Schiet övergaahn is. Aaber dat kann een ok woanners bi passeern. Dat is ja woll siet ganz lang Tieden bekannt, wo good dat Bewegen is, un de Natuur hätt de Minschen aaber ok de Derten dat so mitgeben.
Mi word dat de Daag so ganz kloor, as ick Biller up een so nömt Wunnerding van i-Phone van een noch nich in disse Welt upstaahn Pupp sehn kunn. De lütt Arms un Benen worden dor in Moder ’s Liev hen- un herreten, bold naa Gymnastik-Aart. Rein wat Seltens, sowat ankieken to könen.
Aaber de Technik maakt ja intüschen veel mögelk, üm sowat ok mittokriegen. Wenn ick man so plietsch mit de Computeree ümgaahn kunn, wat kreech ick denn woll all mit!
De Minschen hebbt mit de Tieden immer mehr Ideen hat, wu man sick good, interessant un besünners good för de Gesundheid bewegen un dorbi villicht sogor noch veel Geld verdenen kann. Tja – un dat nich maal so schlecht!
Man kann ’t ja faaken lesen, wuveel Penunsen för Football-, Tennis-, Golfspeler un Boxers to ’n Bispeel betaahlt word. Also mit een good sport-lich Talent kann veel up ’t Konto spölt worden.
Mien Moder hätt maal in ’t laatere Öller seggt: „Wenn ick vandaag jung wär, denn gung ick in ’n Danzclub“, denn se danz so licht as ’n Folter, bruuk also kien Benen sorteern bi ’t Danzen.
De Fraag, wat he vandaag vörn Sport drieven dä, hebb ’k ok een Keerl ut de Rentner-rieg stellt, un he sä ganz fix ohn veel to överlergen, dat he vandaag as jung Minsch Footballer werden wull, vansülben mit de Hopnung, Bundesligaspeler to werden wegen dat moi Inkaamen.
Wiel Football jüst aaber ok woll staadig aktuell is, kaam ick dorup, dat mi dat as jung Minsch ok gefalln har. Geern har ’k as Kind een rechten Leerfootball hat, üm mit de poor Jungens ut de Naaberschkop de Football in ’n „Kasten“ to kloppen.
Mit so ’n Behelp van bunten Gummiball hebbt wi aaber doch veel speelt un Vaaders Busseldör muss immer as Tor herholln un bi jedet Tor gev ’t een gewaltig luut Rumsen.
Mit de Mögelkheiden van vandaag wär ’k ok geern mit ’n Rönnrad up Tour wen. Talent har ’k woll bi ’t Schmieten mit ’n Schlagball, dordör hätt Vaader ’s Schüür- un Waahnhuusdack dückdig leden. Wenn ick denn mit de „Heuss-Urkunnen“ van de Bundesjugenspele naa Huus käm, vertell Vaader stolt, dat dorüm sien Dack hier un dor woll ’n bäten verneelt worden is.
Denn hebb ’k ok noch anner Lü befraagt, wat se as jung Minsch vandaag villicht för ’n Sport bedreven harn. Man nööm mi dor Football, Rieden, Turnen, Tennis, Surfen, Dischtennis, Lopen, Seilen, Danzen, Jiu Jitsu (üm sick vör biester Minschen wehren to könen). Een poor Sportaarten wurden mi ok düppelt nömt, aaber nich de, wor man sick de Klüsen mit inhauen kann, ick meen dormit dat Boxen. Aaber dat word hütigendaags ja woll veel vör de Discos bedreben!
