• Jobs
  • Immo
  • Auto
  • Kleinanzeigen
  • Trauer
  • Hochzeit
  • Guide
  • Shop
  • Tickets
  • Veranstaltungskalender
  • Fußball
  • Werben
  • Kontakt
  • Über uns
 
NWZonline.de Nachrichten Kultur Heimatsprachen Snacken en Verstaan

De lesde Breef: Buten blieven

01.07.2020

Em truck dat na den Kroog hendal, wor all de Insitters a. D. är eerst Beer drunken. Bannig Smacht harr he dor up, un dar kunn he ok den Breef lesen, de lesde, de van Huus kamen weer.

He gung de Strat langs: Laat dar Lüüd stahn, dach he, de em nakeeken un säen: „Kiek, dat is een, de jüst ut’n Knast kamen is.“ Dat weer em eendoont.

Sien eersten Trää leeten wat möö. Nöger na’t Kroog to wurrn se risch. Dar um’e Eck mutt’e wäsen, wahrhaftig, dar stunn’t al in grode swarte Bookstaven baben de Döör „Zur guten Hoffnung“. Verdoriweg, wat’n Namen för so’n Kabuff, dat dar in’n Souterrain leeg.

Achter de Döör deen de Lüüd sik dick in Gröhln un Räsoneeren. He druck de Klink dal. Een Pingel weer baben em an schelln. In’t Döörlock gung he stahn, un so hör dat Gröhlen un Räsoneeren up. Still weer’t as up Kösters Kamp, wor jüst’n Dodenkist in’e Kuhl keem, un he kunn se nich telln, de Ogen, de em anglupschen un beluurn deen.

„Moin“, sä he kortaf. De dar seeten, de antern all dörnanner. Dat hör sik an, as slog’n Bulg van Larm un Geluut, mal höger, mal sieter dör den Kroog un legg sik an'n Enn’n dal up Stöhl, Disch un Bänk. Dar achtern in’e Eck stunn noch’n leddigen Disch. He gung mank de Dischreegen dör, un elk Trä van sien Schoohwark kloppde up den smärigen roden Zement as up’n hollen Böön. Kling jüst so as verläden Jahr, dach he, wor een Kriminal an sien Huusdöör kloppt un ropen harr: „Aufmachen – Polizei!“

„Ne lütje Laag“, reep he den Kröger to. De keem to Been, spööl’n Glas in’t Waterback, holl de Koornbuddel ut’t Iesschapp un dreih un wenn sik as’n Aap. Mit dat Klappen van'n Iesschappendöör keem ok woller dat Räsoneeren in’e Gang un ut de Eck, wor de Tonbank stunn, klung van’n Musikbox de neeste Hit röver.

Man de Breef seet ja noch in sien Binnertasch, de wull he foors lesen: Anna is dalkamen, stunn dar, un een Jung is up-stahn. „Noch'n lütje Laag“, reep he, un de Kröger keem, sett Beer un Sluck vör em dal un maak Sträken. Un denn harr sien Mudder noch schräven: Du kannst bi us nich unnerkamen, Vadder hett sien Baantje verlorn un van dat bäten Wäkengeld köönt wi nich läven ... „Noch’n lütje Laag“, reep he in’n dullen Kopp, un de Kröger keem un maak Sträken. He lees den Breef woll dree- un veermal un de Stä: Du kannst bi us nich unnerkamen, de lees he so faken, de Bookstaven fungen vör sien Ogen an to danzen un swirrn vör sien Kopp rum. An Ennen wurrn de Bookstaven to lichtfardige Wiever, de em toprosten deen un em targen mit är nakden Been. Em wurd dor heel mall van in’n Kopp.

Du kannst bi us nich unnerkamen. Dat heet doch? – Buten blieven. Ja, dat heet dat! Sien egen Lüüd wulln nix mehr van em weten.

Meine Themen: Verpassen Sie keine für Sie wichtige Meldung mehr!

So erstellen Sie sich Ihre persönliche Nachrichtenseite:

  1. Registrieren Sie sich auf NWZonline bzw. melden Sie sich an, wenn Sie schon einen Zugang haben.
  2. Unter jedem Artikel finden Sie ausgewählte Themen, denen Sie folgen können.
  3. Per Klick aktivieren Sie ein Thema, die Auswahl färbt sich blau. Sie können es jederzeit auch wieder per Klick deaktivieren.
  4. Nun finden Sie auf Ihrer persönlichen Übersichtsseite alle passenden Artikel zu Ihrer Auswahl.

Ihre Meinung über 

Hinweis: Unsere Kommentarfunktion nutzt das Plug-In „DISQUS“ vom Betreiber DISQUS Inc., 717 Market St., San Francisco, CA 94103, USA, die für die Verarbeitung der Kommentare verantwortlich sind. Wir greifen nur bei Nutzerbeschwerden über Verstöße der Netiquette in den Dialog ein, können aber keine personenbezogenen Informationen des Nutzers einsehen oder verarbeiten.