• Jobs
  • Immo
  • Auto
  • Kleinanzeigen
  • Deals
  • Trauer
  • Hochzeit
  • Guide
  • Shop
  • Tickets
  • Veranstaltungskalender
  • Fußball
  • Werben
  • Kontakt
  • Über uns
 
NWZonline.de Nachrichten Kultur Heimatsprachen Snacken en Verstaan

Handwarker blifft Handwarker . . .

25.03.2019

Jan Spin weer Müürmann. As he up de 65 togung, snack he bloots noch van sien Rente un van sinen „Ruhestand“ – Jungedi, wat wull he sik dat denn kommod maken. Lütt Huus wull he sik buten an‘n Busch boon. Lütten Gorn harr he dor ja al. „Man bloots nich to groot boon“, säe he denn, „bloots dat allernödigste, anners hett‘n dor naher bloots Arbeit van“. Un van Arbeit wull Jan Spin nu nix mehr weten. As dat nu up den Sömmer togung, weer Jan up sien Land noch s’abends laat gewaltig an’t Wuraken un Quäln. – „Hallo, Jan!“, reep ik em to, „du maakst woll Överstunnen? Dat is ja bold düster!“ „Ja“, säe Jan, un wisch sik dat Sweet af, „ik bün nu ja in‘n Ruhestand, un darüm maak ik dat Utschachten för mien Neeboo sülfst. – Dat Geld kann‘k mi doch verdenen.“

Un as ik denn meen, he schull‘t doch man‘n beten sinnig angahn laten, schoov Jan al wedder mit de Kaar los un reep: „Kien Tiet! – Wi willt to Harfst noch intrecken!“

Veer Weken later slääp Jan van morgens bit abends Steen, meng Kalk un Zement an, un speel Handlanger un Müürmann togliek. Naher deck he noch sülfst dat Dack, un s‘abends weer he noch bi Licht an‘t Malen un Tapezeern. Un denn weer Jan ok richtig to Harfst al so wiet, dat he intrecken kunn.

As ik em denn maal wedder besöken dee, mi sien ne‘e Wahnung antokieken, weer Jan in‘n Gorn an‘t Graben un Rijohlen. He plant Hagen, Bööm un Struukwarks, un harr dat so drock, dat kien Woort mit em to snacken weer.

Över Winter weer he van fröh bit laat an‘t Sagen, Kloppen un Timmern. He boo sik‘n Stall för Holt, Törf un Warktüüg. To Vörjahr boo he sik denn noch‘n Höhnerstall. - „Bloots för‘n half Dutz Höhner“, sä he, „dat‘n tominnst‘n paar Eier för den egen Huushalt hett.“

Man eenmal, dat weer so Anfang Juni, un in‘n Gorn geev dat woll bi‘n besten Willen nix mehr to doon, dor seet Jan Spin vör‘n Huus in de Sünn un hujahn. – „Na“, meen ik dor, „nu hest du dat woll ennelk so, as du dat ümmer hebben wullst. Nu hest du doch ennelk dien richtigen ‚Ruhestand‘!“ Dor keek Jan mi so‘n beten benaut an, un he meen: „Ümmer bloots sitten un lesen kannst ja ok nich!“

In‘n Harfst boo he sik‘n Swienstall. – „Bloots so‘n lütte Mästeree“, säe Jan, „wat mööt ik doch ja üm de Hand hebben.“ To Vörjahr stund up dat Grönland, wat he noch nich ganz ümbraken harr, een groot Höhnerhuus för hunnert Höhner. – As he dat klar harr, keem‘n Immenschuur an de Reeg.

Un as sien Froo mi maal de Höhnertucht, de Swienemästeree un dat Gewächshuus, wat he ok al wedder togangenklütert harr, wies, vertell se mit een lütten Süffzer, dat Jan van‘n Morgen bit s‘abends Klock teihn togangen weer, un dat he dat doch reinweg överdrieven dee. He leet sik ja bold nich maal Tiet to‘n Eten.

Dor kunn ik dat nich laten, so‘n beten to sticheln, un ik säe, mit een lütt Smustergrienen to Jan, nu harr he sik sinen Ruhestand ja wunnerbar kommodig inricht. – „Ja“, gröhl Jan Spin dor vergnöögt na mi röver, ahn van sien Arbeit uptokieken, „nu maakt mi de Ruhestand eerst richtig Spaaß!“

(Aus: Karl Bunje, Jan Spin – Plattdeutsche Geschichten, Heinz Holzberg Verlag Oldenburg)

Meine Themen: Verpassen Sie keine für Sie wichtige Meldung mehr!

So erstellen Sie sich Ihre persönliche Nachrichtenseite:

  1. Registrieren Sie sich auf NWZonline bzw. melden Sie sich an, wenn Sie schon einen Zugang haben.
  2. Unter jedem Artikel finden Sie ausgewählte Themen, denen Sie folgen können.
  3. Per Klick aktivieren Sie ein Thema, die Auswahl färbt sich blau. Sie können es jederzeit auch wieder per Klick deaktivieren.
  4. Nun finden Sie auf Ihrer persönlichen Übersichtsseite alle passenden Artikel zu Ihrer Auswahl.

Ihre Meinung über 

Hinweis: Unsere Kommentarfunktion nutzt das Plug-In „DISQUS“ vom Betreiber DISQUS Inc., 717 Market St., San Francisco, CA 94103, USA, die für die Verarbeitung der Kommentare verantwortlich sind. Wir greifen nur bei Nutzerbeschwerden über Verstöße der Netiquette in den Dialog ein, können aber keine personenbezogenen Informationen des Nutzers einsehen oder verarbeiten.