• Jobs
  • Immo
  • Auto
  • Kleinanzeigen
  • Trauer
  • Hochzeit
  • Guide
  • Shop
  • Tickets
  • nordbuzz
  • Fußball
  • Werben
  • Kontakt
 
NWZonline.de Nachrichten Kultur Heimatsprachen Snacken en Verstaan

In’n Snack          mit en Glücksbringer

16.01.2021
Se sind swart antrucken, kladdert up de Dacken un sind för veel Minschen dat Glück in Person: De Schosteenfeger. Een darvan is Leon Scharf ut Gannerseer. He hett 2020 van de Uttobildenden de best Prüfung maakt un is Sieger in’t Rebeet van de Handwarkskamer Ollnborg. Bi’t Landesentschee kunn he de darde Platz maken. Wi hebbt mit Leon Scharf en Snack holln.
Frage: Warüm hebbt Se sik för en Utbilden to’n Schosteenfeger entscheden?

Scharf: In de 8. Klass mussen wi en Schoolpraktikum maken un ik hebb Utkiek na en Beruf holln. Mien Vader (Heizungsbauer/Anlagenmechaniker) geev mi de Tipp: „Weer doch Schosteenfeger.“ Mien Praktikum hebb ik denn bi Schosteenfegermester Matthias Urner maakt. Dat hett mi glieks so goot gefulln, dat ik na mien Afsluss van de Realschool hier en Utbilden maakt hebb.

Frage: Wat hett Ehr Ümfeld an dissen Berufswunsch seggt?

Scharf: Familje un Verwandte hebbt sik freit. Mien Frünnen weern eerstmal luurig, man na kört Tiet funnen se dat ok goot.

Frage: Na Ehr Utbildn kunnt Se nich övernahmen weern. Wat nu?

Scharf: Dat weer furs klar, dat ik nich övernahmen weern kunn. En Schosteenfegerbedriev besteiht meistieds blots ut een Mester un een Gesellen. Ik wark nu bi Frau Ina Naber in Huntlosen.

Frage: Wat sind Ehr Upgaven jeden Dag?

Scharf: Mien Hauptupgaven sind: Överprüfen van Heizungen up Brand- un Bedrievsseekerheet un dat Meten van de Immissionsschutz, dat Kehren van de Schosteens un ünner annern ok dat Nakieken van Rookmelders oder dat Nakieken van de Gasanslüsse in de Hüüs.

Frage: An weck Vörurdeel över Schosteenfegers is wat an?

Scharf: Dat wi (meistieds) swart sind un Glück bringt.

Frage: Hebbt Se dor al gediegen Saken beleevt?

Scharf: Klar, jed Schosteenfeger hett sowat mal beleevt. Ünner annern ward een up’n Mal van Achtern up de Schuller kloppt un denn kaamt de Spröök: „Bringt ja Glück“.

Frage: Warüm seggt all, dat dat Glück bringen deit, de Schosteenfeger antofaten?

Scharf: Wegen dat apen Füer in de Öfen hebbt de Hüüs fröher fakener brennt. Weer de Schosteenfeger dor, is erstmal nix malöört. Dat is wieldat de Schosteenfeger Glück bringen deit un en Glücksbringer schall man ja meistiets anfaten, oder an rieven. Dat höört to us Beroop enfach mit d’rto un dat mööt een bi de Utwahl van de Beroop ok klar ween.

Frage: Is Se dor en besünner Beleevnis in’n Kopp hangen bleven?

Scharf: Ja, ik muss al so en paar Lottoschiens utfülln, oder de sind an mi rievt wurrn. Ik funn dat jümmers spaßig.

Frage: Hebbt Se sülvst al mal bi Ehrn Beroop Glück brukt?

Scharf: Ik glööv, jedeen brukt Glück. Dat fangt al denn an, dat de Kunde in’t Hus is un de Dacken nich so glitschig.

Frage: Warüm dreegt Schosteenfegers en Zylinder?

Scharf: Wieldat in fröher Tieden de Schosteenfeger ok bi wohlhabend Lüe fegen mussen un bi de is man blots mit en anstännig Hot rinkamen. So hett de Schosteenfeger jichtenswann anfungen Zylinder to dregen un dat ist bit vandagen so bleven. De en Zylinder dregen dröff, mööt tominnst en Geselle ween. Dat weer damals so un is ok bit vandagen so.

Frage: Wat möögt Se besünners geern an Ehrn Beroop?

Scharf: De Afwesseln bi de Arbeit, de Kuntakt mit de Minschen un de fein Utsicht, wenn ik up en Dack stah.

Frage: Wat sind Ehr Vörhabens för de Tokunft?

Scharf: 2022 will ik anfangen, mien Mester to maken. Of ik eens Dags mi mal mit en egen Kehrrebeet sülvststännig maken will, dat weet ik noch nich.

Frage: Wat mööt man na Ehr Menen können, wenn man en Utbilden as Schosteenfeger/sche maken wull?

Scharf: He of Se schull koppfast ween, kien Problem dormit to hebben, sik mal schetterig to maken un ok goot snacken können. De Kunden mööt de komplexen Aflope ok goot verklart weern.

Meine Themen: Verpassen Sie keine für Sie wichtige Meldung mehr!

So erstellen Sie sich Ihre persönliche Nachrichtenseite:

  1. Registrieren Sie sich auf NWZonline bzw. melden Sie sich an, wenn Sie schon einen Zugang haben.
  2. Unter jedem Artikel finden Sie ausgewählte Themen, denen Sie folgen können.
  3. Per Klick aktivieren Sie ein Thema, die Auswahl färbt sich blau. Sie können es jederzeit auch wieder per Klick deaktivieren.
  4. Nun finden Sie auf Ihrer persönlichen Übersichtsseite alle passenden Artikel zu Ihrer Auswahl.

Ihre Meinung über 

Hinweis: Unsere Kommentarfunktion nutzt das Plug-In „DISQUS“ vom Betreiber DISQUS Inc., 717 Market St., San Francisco, CA 94103, USA, die für die Verarbeitung der Kommentare verantwortlich sind. Wir greifen nur bei Nutzerbeschwerden über Verstöße der Netiquette in den Dialog ein, können aber keine personenbezogenen Informationen des Nutzers einsehen oder verarbeiten.