• Jobs
  • Immo
  • Auto
  • Kleinanzeigen
  • Trauer
  • Hochzeit
  • Guide
  • Shop
  • Tickets
  • nordbuzz
  • FuPa
  • Werben
  • Kontakt
 
24.09.2015

Nich blot de Karussells, Fohrgeschäfte or all de Wuss- und Kookenbuden up Mart, ne wat us damals ok jümmers wedder neschierig maken de, dat weer de billige Jacob up Roonkarker Mart.

Ick seh em vandaagen noch dar stahn, mit sien grooten Zylinder up`m Kopp, kareert Hemd mit upkrempelte Ärmel, daröver eene swarte West, wo eene lange Uhrkett rutbaumeln de.

Sien Stand weer jümmers vör de Markthalle, dar wo ok annere Verkoopstände weern. Blot vör sien Stand drängeln sick de Lüüe, besunners wi Jungs un veele Kinner. Wi he de Lüüe mit siene Snacks de Waren andreihn de, dat weer ganz wat eenmaliget. He verstund dat besunners, wen he wat von siene Waren verkööpen kunn.

An sien Stand kunnst dat kööpen, wat man all Daags so bruuken deiht. Huushaltswaren, wat för de Warkstäh, wat toon Neihn, Knööp, Gummiband un all annern Plünnkraam.

Lustig weer dat jümmers, wenn he dar soon Froominsch fun`d har, de he Gummiband verkööpen de. Bi`t affmeeten von dat Gummiband gung dat nu jo los, noch`n Meter, un noch`n Meter, un noch`n Meter, darbi reckte he dat Gummiband ganz ut, so dat he dar meist dat Duppelte bi utmeten de, as he överhaupt verkööpen de.

Ok de Jücken (Hosenträger) för de Mannslüüe kunn he wunnerbar anpriesen.

He knööp sick de sülmst an un maakte dat erstmal vör, wo de överall to gebruuken weern. Erstmal de Büxen holn und denn wenn du mal ut de Büx mööst, so weer sien Snack, bruukst se gar nich affknööpen, ne denn reckst du se ganz ut, un bumms is de Büx unnen.

Awer nich blot too`n Büxen hool`n weern de goot, ne wenn du mal de Groopenkar schuuwen mööst, kannst se dar ok as Traggurte nutzen, meende he.

Ja, so har he över jedet Deel, dat he in de Hand nehm, sien Vers parat, man kunn eenfach nich bi em wegfind`. Eene Mutter, de dar mit ehren lüttjen Jung stund`, meende do, dat is jo interessanter as bi dat Kasperle-Theater, dar wull er`n lüttjen Heini gar nich mehr tokieken un hier steiht he nu all`n halve Stund.

Ja, wer den Jacob nich sehn un beleewt hett, kann dat eenfach nich glöben, wo disse Kerl dat jümmers wedder klar kreeg, de Lüüe, ja awer ok de Kinner mit eene Mimik un de Snacks in sienen Bann to trekken. To de Tiet weer dat all een Original, as wi dat vandaagen so seggt.

Man kann em all, so as wi dat hütigendags beleewt, mit de Marktschreiers verglieken. Hier kann man ok wahrhaftig klooke un infallsrieke Kerls sehn un beleewen, blot mit den Unnerscheed, de billige Jacob up Roonkarker Markt bröchte siene Snacks all up Platt.

Leider is he de letzten Jahre nich mehr dar, he fehlt us, blot de Markt geiht wieter.

Weitere Nachrichten:

Roonkarker Mart

Ihre Meinung über 

Hinweis: Unsere Kommentarfunktion nutzt das Plug-In „DISQUS“ vom Betreiber DISQUS Inc., 717 Market St., San Francisco, CA 94103, USA, die für die Verarbeitung der Kommentare verantwortlich sind. Wir greifen nur bei Nutzerbeschwerden über Verstöße der Netiquette in den Dialog ein, können aber keine personenbezogenen Informationen des Nutzers einsehen oder verarbeiten.